उपसंपादक:-मिलिंद जंजाळे
देशाच्या सार्वभौमत्व, एकता आणि संविधानिक मूल्यांचा गौरव करणारा 77 वा प्रजासत्ताक दिन यावल नगरपरिषदेत अत्यंत उत्साहात, देशभक्तीच्या वातावरणात आणि भव्यतेने साजरा करण्यात आला. या प्रसंगी लोकनियुक्त नगराध्यक्षा सौ. छाया अतुल पाटील यांच्या शुभहस्ते ध्वजारोहण संपन्न झाले.
ध्वजारोहणानंतर राष्ट्रगीताच्या गजरात संपूर्ण परिसर देशभक्तीने भारावून गेला. “वंदे मातरम्” व “भारत माता की जय” च्या घोषणांनी नगरपरिषद परिसर दुमदुमून गेला.
यावेळी नगरपरिषदेचे उपाध्यक्ष, नगरसेवक, नगरसेविका, मुख्याधिकारी,अधिकारी-कर्मचारी, विविध विभागांचे कर्मचारी, नागरिक, महिला, युवक व विद्यार्थी मोठ्या संख्येने उपस्थित होते.
संविधानाचा सन्मान आणि विकासाचा संकल्प
ध्वजारोहणानंतर नगराध्यक्षा सौ. छाया अतुल पाटील यांनी उपस्थितांना शुभेच्छा देत सांगितले की,
“प्रजासत्ताक दिन हा केवळ उत्सव नसून, संविधानाने दिलेल्या अधिकारांची व कर्तव्यांची आठवण करून देणारा दिवस आहे. यावल शहराचा सर्वांगीण विकास, स्वच्छता, पाणीपुरवठा, रस्ते, आरोग्य व शिक्षण या मूलभूत सुविधा सक्षम करण्यासाठी नगरपरिषद कटिबद्ध आहे.”
शिस्तबद्ध संचलन व सांस्कृतिक रंग
कार्यक्रमात शिस्तबद्ध मानवंदना, देशभक्तीपर गीतांनी वातावरण भारावून टाकले. विद्यार्थ्यांनी सादर केलेल्या सांस्कृतिक कार्यक्रमांनी उपस्थितांची मने जिंकली.
