उपसंपादक :- मिलिंद जंजाळे
यावल तालुक्यातील तापी काठावरील बोरावल बुद्रुक, बोरावल खुर्द, पिंपरी आणि टाकरखेडा येथील ग्रामपंचायतींच्या कामकाजातील अनियमिततेप्रकरणी मोठी प्रशासकीय कारवाई करण्यात आली असून संबंधित ग्रामपंचायत अधिकारी श्रीमती सुषमा दिलीप कोळी यांना निलंबित करण्यात आले आहे. या निर्णयामुळे ग्रामपंचायत विभागात एकच खळबळ उडाली आहे.
सदर ग्रामपंचायतींच्या कार्यवाहीची तपासणी करण्यासाठी नियुक्त समितीने अभिलेखांची मागणी केली होती. मात्र आवश्यक कागदपत्रे व अभिलेख उपलब्ध न करून दिल्याने चौकशीचे कामकाज पूर्ण होऊ शकले नाही. या प्रकरणी प्राथमिक चौकशी अहवाल रावेर पंचायत समितीचे गटविकास अधिकारी यांच्या समितीमार्फत सादर करण्यात आला. अहवालात प्रशासकीय अनियमिततेस संबंधित अधिकारी जबाबदार असल्याचे नमूद करण्यात आले.
या अहवालाच्या आधारे मुख्य कार्यकारी अधिकारी, जिल्हा परिषद जळगाव यांनी महाराष्ट्र जिल्हा परिषद जिल्हा सेवा (शिस्त व अपील) नियम १९६४ मधील नियम ३ भाग (१) अन्वये कारवाई करत श्रीमती सुषमा कोळी यांना जिल्हा परिषद सेवेतून निलंबित करण्याचे आदेश जारी केले.
निलंबन कालावधीत त्यांना पंचायत समिती चाळीसगाव अंतर्गत ग्रामपंचायत देशमुखवाडी येथे मुख्यालयी उपस्थित राहण्याचे निर्देश देण्यात आले आहेत.
या कठोर कारवाईनंतर यावल तालुक्यातील ग्रामपंचायत विभागात धास्तीचे वातावरण निर्माण झाले असून, इतर ग्रामसेवक व संबंधित अधिकारी देखील प्रशासनाच्या रडारवर असल्याची चर्चा सुरू आहे. पारदर्शक कारभार व अभिलेख व्यवस्थापनाबाबत प्रशासन आता अधिक कडक भूमिका घेणार असल्याचे संकेत मिळत आहेत.
