भुसावळ एमआयडीसी अवैध उत्खनन प्रकरणातील मुख्य ‘मुरुम माफियांवर’ गुन्हे दाखल करा, अन्यथा तीव्र आंदोलन – रिपब्लिकन सेना जिल्हाध्यक्ष विनोद सोनवणे

तालुका प्रतिनिधी: राहुल जयकर

भुसावळ तालुक्यातील किन्ही व कन्हाळे बुद्रुक परिसरातील एमआयडीसी क्षेत्रात झालेल्या कोट्यवधींच्या अवैध मुरुम उत्खनन प्रकरणात प्रशासनाने केवळ शासकीय विभागावर दंडात्मक कारवाई करून मुख्य सूत्रधारांना पाठीशी घातल्याचा गंभीर आरोप रिपब्लिकन सेनेने केला आहे. या प्रकरणातील मुख्य कंत्राटदार आणि मुरुम माफियांवर तात्काळ फौजदारी गुन्हे दाखल न झाल्यास तहसील कार्यालयावर तीव्र जनआंदोलन छेडण्याचा इशारा रिपब्लिकन सेनेचे जिल्हाध्यक्ष विनोद सोनवणे यांनी तहसीलदार यांना दिलेल्या निवेदनाद्वारे दिला आहे.
रिपब्लिकन सेनेने केलेल्या तक्रारीनंतर महसूल विभागाने एमआयडीसीच्या जळगाव उपविभागावर ४७,३२,२४० रुपयांचा दंड ठोठावला असून एका डंपरवर २,३९,२३० रुपयांची कारवाई केली आहे. मात्र, ही कारवाई केवळ कागदोपत्री तर नाही.कारण मुरुम चोरी करणारे जेसीबी, पोकलेन मालक आणि कंत्राटदार अद्याप मोकाट आहेत.सदर ठिकाण रहदारीचे असल्याने तेथुन संबंधित महसूल अधिकाऱ्यांची ये जा चालू असते परंतु यांनी कारवाई करणे अपेक्षित असताना त्यांनी त्याकडे दुर्लक्ष केले
निवेदनातील प्रमुख मागण्या व मुद्दे
1) केवळ एमआयडीसीवर दंड आकारून भागणार नाही, तर प्रत्यक्षात चोरी करणाऱ्या कंत्राटदारांवर भारतीय न्याय संहिता (BNS) कलम ३७९, ४३४ आणि पर्यावरण कायद्यांतर्गत गुन्हे दाखल करावेत.

2) प्रशासनाने मोजलेले ३९७ ब्रास उत्खनन संशयास्पद असून, प्रत्यक्षात हे उत्खनन २,००० ब्रासपेक्षा जास्त आहे. यासाठी ‘ड्रोन’ किंवा ‘डीजीपीएस’ तंत्रज्ञानाचा वापर करून पुनर्मोजणी करावी.

3) ‘आशा कन्स्ट्रक्शन’ (डंपर क्र. MH19 CY 0438) व इतर कंत्राटदारांनी हा चोरीचा मुरूम ज्या सरकारी किंवा खाजगी कामांवर वापरला, त्याचे ‘मटेरियल ऑडिट’ करावे.

4) संबंधित कंत्राटदारांची बिले रोखून त्यांना भविष्यात कोणत्याही शासकीय निविदेत सहभागी होण्यापासून कायमस्वरूपी बंदी (Blacklisting) घालावी.

5) महाराष्ट्र जमीन महसूल संहितेनुसार अवैध उत्खननात वापरलेली सर्व अवजड यंत्रसामग्री जप्त करावी.

या प्रकरणात मोठे रॅकेट सक्रिय असून महसूल, भूविज्ञान आणि खनिकर्म विभागाची संयुक्त समिती (SIT) नेमून चौकशी करण्याची मागणी करण्यात आली आहे. येत्या १० दिवसांत मुख्य सूत्रधारांवर कारवाई न झाल्यास रिपब्लिकन सेना स्टाईलने तीव्र आंदोलन करण्यात येईल.
याप्रसंगी रिपब्लिकन सेनेचे जिल्हाध्यक्ष विनोद सोनवणे, जिल्हा नेते दिनेश इखारे, महिला जिल्हाध्यक्षा वंदनाताई सोनवणे, जिल्हा महासचिव वंदनाताई आराक, जिल्हा उपाध्यक्ष देवदत्त मकासरे मेजर, बंटी नरवाडे, स्वप्नील सोनवणे, बंटी सोनकांबळे आदी पदाधिकारी उपस्थित होते.