सुनेत्रा पवार यांच्याबाबत आमदार रोहित पवार यांचे बीडमध्ये मोठं विधान, म्हणाले त्यांनी

बीड/प्रशांत बाफना
: राष्ट्रवादी काँग्रेस शरदचंद्र पवार पक्षाचे आमदार रोहित पवार यांच्या उपस्थितीत बीडमध्ये जनआक्रोश मोर्चा काढण्यात आला. यावेळी त्यांनी बीडच्या पालकमंत्री तथा राज्याच्या उपमुख्यमंत्री सुनेत्रा पवार यांच्यावर निशाणा साधला. सुनेत्रा पवार यांनी दुष्काळी परिस्थितीत दौरे केले पाहिजेत. केवळ कागदी दौरे न करता दुष्काळग्रस्त भागाची पाहणी करून शेतकऱ्यांना तात्काळ ठोस आर्थिक मदत जाहीर करावी, असा रोखठोक सल्ला देखील दिला.

आमदार रोहित पवार यांनी उपमुख्यमंत्री सुनेत्रा पवार यांच्यावर निशाणा साधला.

नेमकं काय म्हणाले

आमदार रोहित पवार यांच्या नेतृत्त्वात बीडमध्ये जिल्हाधिकारी कार्यालयावर जनआक्रोश मोर्चा काढण्यात आला. माध्यमांशी संवाद साधताना आमदार पवार म्हणाले, मराठवाड्यात दुष्काळी परिस्थिती आहे. या स्थितीत सरकारने शेतकऱ्यांना 50000 रुपये हेक्टरी मदत द्यावी. सुनेत्रा पवार या राज्याच्या उपमुख्यमंत्री आहेत. त्यांनी दौरा केलाच पाहिजे. त्यांचे मंत्री भरणे मामा दौरा करत आहेत. शेतकरी त्यांना विचारात आहेत. त्यावेळी ते मला कोणतेही अधिकार नसल्याचे सांगतात. तुम्हाला अधिकार नसतील तर मंत्री करून काय उपयोग झाला? स्वाभिमानी असाल तर सरकारची साथ सोडा आणि रस्त्यावर या, असा खोचक टोला रोहित पवार यांनी लगावला. इतकंच नाही तर लोकांच्या बाजूने लढा आणि सरकारला गुडघ्यावर आणून शेतकऱ्यांना मदत मिळवून द्या, असे रोहित पवार यांनी सल्ला दिला.

‘असं दौऱ्याचं नाटक करून चालणार नाही’

दुसरीकडे राज्याच्या उपमुख्यमंत्री व बीडच्या पालकमंत्री सुनेत्राताई पवार यांनी देखील दुष्काळी परिस्थितीमध्ये दौरा केला पाहिजे. शेतकऱ्यांच्या व्यथा जाणून घेतल्या पाहिजेत. इकडे मुख्यमंत्री दौरा करत आहेत परंतु बॅरिकेट लावत आहेत, मेटल डिटेक्टर लावत आहेत, असं दौऱ्याचं नाटक करून चालणार नाही, तुम्ही घरी जावा, एसीमध्ये बसा, ऑफिसमध्ये बसा, असा मुख्यमंत्री देवेंद्र फडणवीस यांना टोला लगावला. शेतकऱ्यांना 50000 रुपये हेक्टरी मदत द्या व मजुरांना 25000 रुपये मदत द्या, अशी आमची मागणी आहे.. ती मान्य होईपर्यंत आम्ही आंदोलन सुरू ठेवणार असल्याचे रोहित पवार यांनी यावेळी सांगितले.

रोहित पवारांनी जालन्यात जाणून घेतल्या शेतकऱ्यांच्या समस्या…

जालना जिल्ह्यातल्या अंबड तालुक्यातील दुष्काळी परिस्थितीची आमदार रोहित पवार यांनी पाहणी केली. डोमेगाव आणि दूनगाव परिसरातील शेतांमध्ये जाऊन त्यांनी पिकांची पाहणी केली. तसेच शेतकऱ्यांशी संवाद साधत त्यांच्या अडचणी जाणून घेतल्या. यावेळी रोहित पवार यांनी शेताच्या बांधावर जाऊन शेतकऱ्यांशी चर्चा केली. पावसाअभावी खरीप पिकांवर झालेला परिणाम, पिकांची झालेली नुकसानस्थिती आणि शेतकऱ्यांना भेडसावणाऱ्या विविध समस्यांची त्यांनी माहिती घेतली. अंबड तालुक्यातील दुष्काळी परिस्थितीची पाहणी करून शेतकऱ्यांच्या समस्या शासनापर्यंत पोहोचवण्याची भूमिका रोहित पवार यांनी यावेळी मांडली