तालुका प्रतिनिधी: राहुल जयकर
यावल शहरातील साने गुरुजी माध्यमिक विद्यालय येथे विद्यार्थ्यांच्या सुरक्षिततेचा गंभीर प्रश्न निर्माण झाला असून शाळेच्या मागील बाजूस नव्याने तयार करण्यात आलेले गेट विद्यार्थ्यांसाठी, विशेषतः मुलींसाठी असुरक्षित ठरत असल्याचा आरोप पालक व नागरिकांनी केला आहे.
सदर शाळा यावल नगर परिषदेच्या अंतर्गत येत असून पूर्वी अस्तित्वात असलेले समोरील बाजूचे मुख्य गेट बंद ठेवून मागील बाजूस नवीन गेट सुरू करण्यात आले आहे. मात्र हे गेट विद्यार्थ्यांच्या दैनंदिन ये-जा साठी गैरसोयीचे असून त्या परिसरात गैरप्रकार होण्याची शक्यता वर्तवण्यात येत आहे. यामुळे विद्यार्थ्यांच्या जीवितास धोका निर्माण होऊ शकतो, अशी तीव्र चिंता पालकांनी व्यक्त केली आहे.
या पार्श्वभूमीवर यावल नगर परिषदेचे मुख्याधिकारी यांना निवेदन देऊन शाळेचे जुने समोरील गेट तात्काळ सुरू करण्याची मागणी करण्यात आली आहे. विद्यार्थ्यांची सुरक्षितता लक्षात घेता प्रशासनाने त्वरित कार्यवाही करावी, अन्यथा पालक व नागरिकांच्या वतीने आंदोलन छेडण्याचा इशाराही देण्यात आला आहे.
यावेळी प्रभाग क्रमांक १० अ चे नगरसेवक श्री. योगेश विजय चौधरी यांच्यासह चेतन अढळकर, रोशन येवले, अतुल चौधरी, मुकेश कोळी, व्यंकटेश बारी, नितीन बारी, रितेश बारी, उज्वल कानडे आदी नागरिक उपस्थित होते.
प्रशासन या गंभीर विषयाकडे गांभीर्याने लक्ष देऊन विद्यार्थ्यांच्या सुरक्षिततेसाठी योग्य तो निर्णय घेणार का, याकडे संपूर्ण शहराचे लक्ष लागले आहे.
