अहिल्यानगर/प्रशांत बाफना
कर्तव्यनिष्ठा, धाडस आणि समाजसेवेचा वसा जपणाऱ्या पोलिसांच्या सन्मानासाठी आयोजित ‘९२.७ बिग एफ एम पोलीस शौर्य सन्मान २०२६’ या सोहळ्यात अहिल्यानगर पोलीस दलाचा दबदबा पाहायला मिळाला. यामध्ये शेवगांव पोलीस ठाण्यातील कर्तव्यदक्ष पोलीस अंमलदार शाम गुंजाळ यांना त्यांच्या उल्लेखनीय कामगिरीबद्दल अहिल्यानगर पोलीस अधीक्षक सोमनाथ घार्गे यांच्या शुभहस्ते’पोलीस शौर्य सन्मान’ देऊन गौरविण्यात आले.
समाजाच्या सुरक्षेसाठी आणि कायदा व सुव्यवस्था राखण्यासाठी शाम गुंजाळ यांनी वेळोवेळी दाखवलेले शौर्य आणि समर्पण वृत्तीची दखल या पुरस्काराद्वारे घेण्यात आली आहे. एका दिमाखदार सोहळ्यात मान्यवरांच्या हस्ते त्यांना हा मानाचा पुरस्कार प्रदान करण्यात आला.
शाम गुंजाळ यांना मिळालेल्या या पुरस्कारामुळे शेवगांव पोलीस ठाणे आणि संपूर्ण अहिल्यानगर पोलीस दलाची मान अभिमानाने उंचावली आहे. जनतेच्या सेवेसाठी रात्रंदिवस तत्पर असणाऱ्या एका सच्च्या पोलीस कर्मचाऱ्याचा हा गौरव असल्याची भावना सर्वत्र व्यक्त होत आहे.
“हा सन्मान केवळ माझा नसून, माझ्या संपूर्ण टीमचा आणि वरिष्ठांच्या मार्गदर्शनाचा विजय आहे. या पुरस्कारामुळे समाजाप्रती असलेली जबाबदारी अधिक वाढली असून, भविष्यातही अधिक जोमाने जनसेवेसाठी कार्यरत राहीन.”
— शाम गुंजाळ, पोलीस अंमलदार (शेवगांव)
या यशाबद्दल शाम गुंजाळ यांच्यावर सर्वच स्तरातून अभिनंदनाचा वर्षाव होत आहे. जिल्ह्याच्या सुरक्षिततेसाठी अहिल्यानगर पोलीस सदैव कटिबद्ध असल्याचे या निमित्ताने पुन्हा एकदा अधोरेखित झाले आहे
