अहिल्यानगर/ प्रशांत बाफना
राहुरी विधानसभा पोटनिवडणुकीचा निकाल आता अवघ्या काही तासांवर आला असून संपूर्ण तालुक्याचे लक्ष मतमोजणीकडे लागले आहे. प्रशासनाने मतमोजणीसाठी सर्व तयारी पूर्ण केली असून आज (ता. 4) सकाळपासून मतमोजणी प्रक्रिया सुरू होणार आहे. सकाळी साडेआठ वाजता ईव्हीएम (EVM) मतमोजणीला सुरुवात होईल, तर पहिला कल सुमारे साडेनऊ वाजता समोर येण्याची शक्यता आहे. दुपारपर्यंत निकालाचे स्पष्ट चित्र दिसणार आहे.
मतमोजणीसाठी टपाली मतांसाठी 2 टेबल, ईटीपीबीएससाठी 4 टेबल आणि ईव्हीएमसाठी तब्बल 14 टेबल्सची व्यवस्था करण्यात आली आहे. एकूण 27 फेऱ्यांमध्ये ही मतमोजणी पार पडणार आहे. प्रत्येक टेबलवर निवडणूक अधिकारी, पर्यवेक्षक, सहाय्यक आणि सुरक्षा कर्मचारी नियुक्त करण्यात आले आहेत.
मतमोजणी केंद्रात कडक सुरक्षा ठेवण्यात आली असून ओळखपत्राशिवाय प्रवेश बंद आहे. मोबाईल, इलेक्ट्रॉनिक उपकरणे तसेच पेन आणण्यासही मनाई करण्यात आली आहे. सर्व प्रतिनिधींना आवश्यक साहित्य प्रशासनाकडूनच पुरवले जाणार आहे.
या पोटनिवडणुकीत राष्ट्रवादी काँग्रेस (शरदचंद्र पवार गट)चे उमेदवार गोविंद मोकाटे आणि भाजपचे अक्षय कर्डिले यांच्यात मुख्य लढत आहे. तसेच वंचित बहुजन आघाडीचे संतोष चोळके आणि शिवसेना (उद्धव बाळासाहेब ठाकरे) गटाचे उमेदवार रावसाहेब खेवरे यांच्याकडेही लक्ष लागले आहे. त्यामुळे निकालाबाबत उत्सुकता शिगेला पोहोचली आहे.
या निवडणुकीत एकूण 3 लाख 33 हजार 545 मतदार होते. त्यापैकी 1 लाख 86 हजार 405 मतदारांनी मतदानाचा हक्क बजावला. यात 1 लाख 1 हजार 991 पुरुष आणि 84 हजार 414 महिला मतदारांचा सहभाग होता.
आता काही तासांतच राहुरीच्या राजकारणाचा नवा चेहरा समोर येणार असून, कोणाचा विजयाचा झेंडा फडकणार याकडे संपूर्ण जिल्ह्याचे लक्ष लागले आहे
