अहिल्यानगर/ प्रशांत बाफना
जामखेड येथे खर्डा पोलिसांनी मध्यरात्री छापा टाकून तब्बल 6 लाख 34 हजार 146 रुपयांचा गुटखा व तंबाखूजन्य पदार्थांचा साठा जप्त केला. या प्रकरणी एका आरोपीविरुद्ध गुन्हा दाखल करण्यात आला असून मालवाहू टेम्पोसह मुद्देमाल हस्तगत करण्यात आला आहे.
जामखेड-मोरेवस्ती रोडलगत प्रोफेसर कॉलनी परिसरात दि. 15 मे रोजी रात्री सुमारे 10.25 वाजता ही कारवाई करण्यात आली. आरोपी बाळु ऊर्फ शिवदत्त नंदकुमार मोहिते (रा. बोराटे वस्ती, जामखेड) याच्या मालकीच्या महेंद्रा जितो मालवाहू बंद बॉडी टेम्पो (एमएच 12 एनएक्स 2183) मधून मोठ्या प्रमाणात प्रतिबंधित पान मसाला व सुगंधी तंबाखू जप्त करण्यात आली.
या प्रकरणी जामखेड पोलीस ठाण्यात गुन्हा रजिस्टर क्रमांक 299/2026 अन्वये भारतीय न्याय संहितेतील कलम 123, 223, 274 व 275 अंतर्गत गुन्हा दाखल करण्यात आला आहे. पोलीस शिपाई बाळु शांतीलाल खाडे (नेमणूक खर्डा पोलीस स्टेशन) यांनी फिर्याद दिली आहे.
कारवाईदरम्यान डायरेक्टर स्पेशल, विमल, सुपर साऊंड, सम्राट, एम. सिलेक्ट, एमएनडी तसेच प्रीमियम शॉट या विविध कंपन्यांचा पान मसाला व सुगंधी तंबाखूचा मोठा साठा जप्त करण्यात आला. जप्त तंबाखूजन्य मालाची किंमत 2 लाख 59 हजार 146 रुपये असून मालवाहू टेम्पोची किंमत 3 लाख 75 हजार रुपये असल्याचे पोलिसांनी सांगितले.
ही कारवाई जिल्हा पोलिस अधीक्षक मुम्मका सुदर्शन,अप्पर पोलीस अधीक्षक वैभव कलुबर्मे, कर्जत उपविभागीय पोलीस अधिकारी प्रवीण लोखंडे यांच्या मार्गदर्शनाखाली करण्यात आली. कारवाईत जामखेड पोलीस ठाण्याचे पोलीस निरीक्षक दशरथ चौधरी, खर्डा पोलीस स्टेशनचे सहाय्यक पोलीस निरीक्षक उज्वलसिंह राजपूत, पोलीस कॉन्स्टेबल बाळु खाडे, वैजिनाथ मिसाळ, धनराज बिराजदार,पोकॉ शशी मस्के व अन्य कर्मचाऱ्यांनी सहभाग घेतला. पुढील तपास पोलीस उपनिरीक्षक गावडे करीत आहेत
