रावेर तालुका प्रतिनिधी | उमेश तायडे
खिर्डी (ता. रावेर): खिर्डी येथील बसथांबा ते जिल्हा परिषद शाळा तसेच खिर्डी–ऐनपूर–निभोरा उड्डाणपुलापर्यंतच्या रस्त्याची अत्यंत दयनीय अवस्था झाल्याच्या निषेधार्थ ग्रामपंचायत सदस्य गणेश देवगीरीकर हे रविवार, दि. 26 जुलै 2026 रोजी बेमुदत उपोषण व रस्ता रोको आंदोलन करणार आहेत. याबाबत त्यांनी सार्वजनिक बांधकाम विभागाला लेखी निवेदन दिले असून महसूल विभाग, मुख्य कार्यकारी अधिकारी, जिल्हा परिषद जळगाव तसेच संबंधित प्रशासनालाही निवेदनाच्या प्रती सादर केल्या आहेत.
देवगीरीकर यांनी यापूर्वीही या रस्त्याच्या दुरुस्तीसाठी उपोषणाचा इशारा दिला होता. त्यावेळी सार्वजनिक बांधकाम विभागाने रस्ता लवकरात लवकर दुरुस्त करण्याचे आश्वासन दिले होते. मात्र अद्यापही कामाला सुरुवात न झाल्याने अखेर ग्रामस्थांसह आंदोलन करण्याचा निर्णय घेण्यात आला आहे.
या रस्त्यावर मोठमोठे खड्डे पडल्याने अनेक अपघात घडल्याचा आरोप करण्यात आला आहे. विशेषतः शाळकरी विद्यार्थ्यांना दररोज जीव धोक्यात घालून प्रवास करावा लागत असून नागरिकांनाही मोठ्या गैरसोयीचा सामना करावा लागत आहे. तसेच गटारी व पावसाच्या पाण्याचा योग्य निचरा होत नसल्याने रस्त्यावर साचलेले दूषित पाणी, दुर्गंधी आणि डासांच्या वाढत्या प्रादुर्भावामुळे रोगराई पसरण्याची भीती व्यक्त केली जात आहे.
“जोपर्यंत रस्त्याच्या दुरुस्तीचे काम प्रत्यक्ष सुरू होत नाही, तोपर्यंत उपोषण सुरूच राहील,” असा निर्धार गणेश देवगीरीकर यांनी व्यक्त केला आहे. प्रशासनाने तातडीने दखल घेऊन रस्त्याचे काम हाती घ्यावे, अशी मागणीही त्यांनी केली आहे.
