यावल वन विभागाच्या गस्ती पथकाने पहाटेच्या धडक कारवाईत बेकायदेशीर वनउत्पादन वाहतुकीचा मोठा पर्दाफाश केला. पाठलाग करून तस्करीसाठी वापरण्यात येणारी नॅनो कार जप्त करण्यात आली असून, त्यामधून 1008 नग सागाचे अनघड बेलन हस्तगत करण्यात आले. वाहनचालक मात्र अंधाराचा फायदा घेत घटनास्थळावरून पसार झाला असून, त्याचा शोध सुरू आहे.आज पहाटे सुमारे 2.00 वाजल्यापासून यावल वन विभागाच्या गस्ती पथकाने वऱ्हागावण–लोणी (पंचक) मार्गावर सापळा रचला होता. सकाळी अंदाजे 6.50 वाजता पांढऱ्या रंगाची संशयास्पद नॅनो कार येताना दिसताच वन कर्मचाऱ्यांनी तिला अडविण्याचा प्रयत्न केला. मात्र चालकाने भरधाव वेगाने वाहन पळवून नेले.वन कर्मचाऱ्यांनी तत्काळ वाहनाचा पाठलाग केला. साई मंदिराजवळील केळीच्या बागेत वाहन लपवून चालकाने अंधाराचा फायदा घेत पलायन केले. वाहन सुरू होत नसल्याने वनक्षेत्रपाल अडावत यांच्या शासकीय वाहनाच्या मदतीने नॅनो कार टोचन करून मुख्य विक्री केंद्र, चोपडा येथे आणण्यात आली. तपासणीदरम्यान वाहनामध्ये 1008 नग सागाचे अनघड बेलन आढळून आले. जप्त वाहन व वनउत्पादन ताबा पावतीद्वारे मुख्य विक्री केंद्र, चोपडा येथे जमा करण्यात आले असून, पंचनामा व इतर कायदेशीर प्रक्रिया पूर्ण करण्यात आली आहे. या प्रकरणाचा पुढील तपास सुरू आहे.ही धडक कारवाई मा. उपवनसंरक्षक श्री. सौरिष सहाय, मा. विभागीय वनाधिकारी (दक्षता) श्री. राजेंद्र सदगीर, मा. सहायक वनसंरक्षक श्री. एम. बी. पाटील आणि मा. सहायक वनसंरक्षक श्री. समाधान पाटील यांच्या मार्गदर्शनाखाली वनपरिक्षेत्र अधिकारी श्री. महेश पाटील, वनपाल श्री. के. एल. धनगर, वनपाल श्री. संजय पाटील, वनरक्षक श्री. सतीश वाघमारे, वनरक्षक श्री. आय. बी. चव्हाण तसेच पोलीस कॉन्स्टेबल श्री. एस. आर. तडवी यांनी संयुक्तपणे यशस्वीरीत्या पार पाडली.वन विभागाच्या या धाडसी कारवाईमुळे बेकायदेशीर वनउत्पादन तस्करी करणाऱ्यांमध्ये खळबळ उडाली असून, अशा कारवाया यापुढेही अधिक तीव्र करण्यात येणार असल्याचे वन विभागाकडून सांगण्यात आले.
