राष्ट्रवादी युवती काँग्रेस, रावेर लोकसभा व निंभोरा ग्रामसेवा समितीचा पुढाकार; विविध मान्यवरांची उपस्थिती
निंभोरा (ता. रावेर) : प्रतिनिधी उमेश तायडे -लोकनेते स्वर्गीय अजितदादा पवार यांच्या स्मृतीप्रित्यर्थ सामाजिक बांधिलकी जपत ‘माणुसकीची दिवाळी – संवेदनांची दिवाळी’ या विशेष उपक्रमाचे आयोजन करण्यात आले आहे. राष्ट्रवादी युवती काँग्रेस, रावेर लोकसभा आणि निंभोरा ग्रामसेवा समिती यांच्या संयुक्त विद्यमाने हा उपक्रम राबविण्यात येत आहे.
दिवाळी हा सण केवळ रोषणाई, फराळ आणि आनंदोत्सवापुरता मर्यादित न राहता समाजातील गरजू घटकांपर्यंत आनंद पोहोचविणारा ठरावा, या भावनेतून या उपक्रमाचे आयोजन करण्यात आले आहे. सामाजिक संवेदना, माणुसकी आणि आपुलकीचा संदेश या माध्यमातून देण्याचा आयोजकांचा प्रयत्न आहे.
या कार्यक्रमाला प्रमुख मार्गदर्शक म्हणून राष्ट्रवादी काँग्रेसच्या प्रदेशाध्यक्ष तथा माजी राज्यमंत्री मा. सौ. निर्मलाताई तुषार नवले, माजी मंत्री तथा महाराष्ट्र राज्य प्रभारी मा. आ. अनिलदादा पाटील, तसेच जिल्हाध्यक्ष व माजी आमदार मा. संजय पवार उपस्थित राहणार आहेत.
याशिवाय वितरण हस्ते म्हणून मा. आ. नंदकुमार महाजन, कार्यक्रमाध्यक्ष म्हणून मा. आ. अमोलभाऊ जावळे, तर उद्घाटक म्हणून मा. उमेशभाऊ नेमाडे यांची उपस्थिती राहणार आहे.
कार्यक्रमाला प्रमुख अतिथी म्हणून प्रतिभाताई शिंदे, मनीषाताई तुपे, जयश्रीताई पाटील, वैशालीताई अमित पाटील, डॉ. केतकीताई पाटील, राजेशभाऊ वानखेडे, रविंद्र नाना पाटील, आफिक शेख दादा, कुर्बान शेख आदी मान्यवर उपस्थित राहणार आहेत.
हा कार्यक्रम शनिवार, सायंकाळी ७ वाजता आठवडे बाजार चौक, निंभोरा, ता. रावेर येथे आयोजित करण्यात आल्याचे निमंत्रण पत्रिकेत नमूद आहे. कार्यक्रमाच्या स्वागताध्यक्षपदी कु. भाग्यश्री विवेक ठाकरे (जिल्हाध्यक्ष, राष्ट्रवादी युवती काँग्रेस) आहेत.
दिवाळीच्या निमित्ताने सामाजिक एकोपा, माणुसकी आणि संवेदनशीलतेचा जागर करण्यासाठी आयोजित या उपक्रमाला नागरिकांनी मोठ्या संख्येने उपस्थित राहावे, असे आवाहन आयोजकांच्या वतीने करण्यात आले आहे.
