उपसंपादक : मिलिंद जंजाळे
भुसावळ शहराच्या औद्योगिक वसाहतीत म्हणजेच खडका MIDC परिसरात अवैध लाकूड तस्करीचा मोठा पर्दाफाश झाला आहे. दैनिक हॅलो बातमीदारच्या दक्ष आणि तपासू पत्रकारांच्या टीमला मिळालेल्या गुप्त माहितीच्या आधारे हा मोठा गैरप्रकार उघडकीस आला आहे.
खडका MIDC मधील NRJ FARMACHEM PVT. LTD. (प्लॉट नं. 69) या फॅक्टरीमध्ये अवैध पद्धतीने मोठ्या प्रमाणात लाकूड विक्री व साठा होत असल्याची खात्रीशीर माहिती मिळताच, हॅलो बातमीदारची टीम तत्काळ घटनास्थळी दाखल झाली. तपासादरम्यान टीमने पाहिले की, जामनेर येथील मुस्ताक अली यांच्या नावाची आयशर (MH18 AC 1109) ही वाहनफॅक्टरीत उभी असून, त्यातून मोठ्या प्रमाणात लाकूड उपसले जात आहे.
टीमने तात्काळ हा प्रकार चित्रीत करून वन विभागाला माहिती दिली. या माहितीच्या आधारे वन अधिकारी श्री. पिंजारी यांनी तत्परतेने कारवाई केली. त्यांच्यासह वनपाल कुलकर्णी मॅडम व त्यांच्या सहकाऱ्यांनी घटनास्थळी धाव घेत, मोठ्या शिताफीने आयशर वाहनासह लाखो रुपयांचा लाकूड मुद्देमाल ताब्यात घेतला.
कारवाई दरम्यान हेही समोर आले की, याच परिसरातील सोहम कंपनीतही अशाच प्रकारे अवैध लाकूड उपसा करण्यात येत होता. मात्र, ते वाहन घटनास्थळावरून पसार झाल्याची माहिती मिळाली आहे. वन विभागाने त्या घटनेबाबतही तपास सुरू केला आहे.
स्थानिक रहिवाशांचा संताप व कौतुक दोन्ही!
खडका MIDC परिसरात या प्रकारच्या अवैध लाकूड तस्करीविरोधात स्थानिक नागरिकांनी संताप व्यक्त केला आहे. त्यांनी वन विभागाकडून नियमित गस्त आणि कठोर कारवाईची मागणी केली आहे. तर दुसरीकडे हॅलो बातमीदारच्या टीमने दाखवलेल्या धाडसाचे सर्वत्र कौतुक होत आहे.
वन विभागाचा इशारा – अवैध धंदे थांबवा, अन्यथा कठोर कारवाई होईल!
वन अधिकारी श्री. पिंजारी यांनी स्पष्ट केले की, “परिसरातील अवैध लाकूड साठे, विक्री किंवा वाहतूक करणे हे गंभीर गुन्हे आहेत. अशा कोणत्याही बेकायदेशीर व्यवहारांना थारा देणार नाही. दोषींवर कठोर कायदेशीर कारवाई केली जाईल.”
** हॅलो बातमीदार”च्या तपासामुळे मोठा रॅकेट उघड**
या घटनेनंतर खडका MIDC परिसरात खळबळ उडाली असून, वन विभाग आता या तस्करीच्या संपूर्ण रॅकेटचा मागोवा घेत आहे. या कारवाईमुळे हॅलो बातमीदारच्या तपास पत्रकारितेची पुन्हा एकदा दखल घेतली जात आहे.
“भुसावळ खडका MIDC मधील अवैध लाकूड तस्करीला आता आळा बसेल का?”
हा प्रश्न सध्या नागरिकांमध्ये चर्चेचा विषय ठरला आहे.
