उपसंपादक:-मिलिंद जंजाळे
वारकरी संप्रदायाच्या भक्तीमय परंपरेचा उत्साह आणि श्रद्धेचा संगम अनुभवायला मिळाला तो किनगाव ते श्री क्षेत्र मुक्ताई पायी दिंडीच्या शिरसाड येथील भव्य स्वागत सोहळ्यात. दिनांक १० फेब्रुवारी रोजी शिरसाड येथे पाटील परिवाराच्या वतीने दिंडीचे जल्लोषात स्वागत करण्यात आले. या प्रसंगी यावल तालुक्याच्या तहसीलदार मोहनमाला नाझीरकर मॅडम यांच्या हस्ते दिंडीचे विधिवत पूजन करण्यात आले.
शिरसाड ग्रामपंचायतीचे मा. उपसरपंच तथा वि.का. सोसायटी संचालक धनंजय पाटील सर, आर. ई. पाटील सर व संपूर्ण पाटील परिवाराने आपल्या राहत्या घरी दिंडीतील वारकऱ्यांसाठी स्वागत सोहळा व महाप्रसादाचे आयोजन केले होते. भक्तिमय वातावरणात टाळ-मृदंगाच्या गजरात वारकऱ्यांचे स्वागत करण्यात आले.
या वेळी पाटील परिवाराचे व्याही, अमळनेर तालुक्यातील लोंढवे गावाचे लोकनियुक्त सरपंच अशोक पाटील यांनी उपस्थित राहून वारकऱ्यांचे मनापासून स्वागत केले. कार्यक्रमाला यावल नगरपरिषदेचे नगरसेवक, शेतकी संघाचे संचालक मंडळ, विविध राजकीय पक्षांचे पदाधिकारी, कार्यकर्ते तसेच तालुक्यातील भाविक मोठ्या संख्येने उपस्थित होते.
दिंडीच्या निमित्ताने सामाजिक बांधिलकी जपत शिरसाड येथील जिल्हा परिषद शाळेतील विद्यार्थ्यांना पाटील परिवाराकडून स्नेहभोजन देण्यात आले. या उपक्रमामुळे विद्यार्थ्यांमध्ये आनंदाचे वातावरण निर्माण झाले.
यावल–रावेर विधानसभेचे लोकप्रिय युवा आमदार अमोल दादा हरिभाऊ जावळे तसेच चोपडा विधानसभेचे आमदार प्रा. चंद्रकांत सोनवणे यांनी दूरध्वनीद्वारे दिंडीतील सर्व वारकऱ्यांना शुभेच्छा देत या उपक्रमाचे कौतुक केले.
कार्यक्रमाची सांगता करताना यावल तालुका शेतकरी खरेदी विक्री संघाचे मा. उपसभापती तथा संचालक तेजस धनंजय पाटील यांनी उपस्थित मान्यवर, वारकरी व सर्व भक्तगणांचे आभार मानले. संपूर्ण सोहळा भक्ती, सेवा आणि सामाजिक एकतेचा आदर्श ठरला.
