उपसंपादक : मिलिंद जंजाळे
जळगाव — जिल्हा परिषद जळगाव अंतर्गत आरोग्य विभागात औषध खरेदी प्रकरणामुळे पुन्हा एकदा मोठा वाद पेटला असून जिल्हा आरोग्य अधिकारी डॉ. सचिन भायेकर यांच्या कामकाजावर गंभीर प्रश्नचिन्ह निर्माण झाले आहे. निकृष्ट दर्जाच्या औषध खरेदीचे आरोप समोर येताच प्रशासनात खळबळ उडाली असून या प्रकरणाची चर्चा जिल्हाभर रंगली आहे.
माहिती अधिकार कार्यकर्ते दिनेश भोळे यांनी औषध खरेदीतील कथित अनियमिततेबाबत सातत्याने पाठपुरावा करत वरिष्ठ स्तरावर तक्रारी दाखल केल्या आहेत. आरोग्य विभागातील उच्च अधिकाऱ्यांकडे सादर करण्यात आलेल्या निवेदनांमुळे हे प्रकरण आता उच्च पातळीवर पोहोचल्याचे समजते.
सूत्रांच्या माहितीनुसार, औषध खरेदी प्रक्रियेत नियमबाह्य निर्णय, निकृष्ट दर्जाची सामग्री आणि आर्थिक अनियमिततेचे प्राथमिक संकेत आढळल्याची चर्चा प्रशासनात सुरू आहे. या पार्श्वभूमीवर जिल्हा आरोग्य अधिकारी डॉ. भायेकर यांच्या उचलबांगळीचे संकेत मिळत असल्याची जोरदार चर्चा जिल्ह्यात आहे.
या प्रकरणामुळे आरोग्य विभागातील कामकाजावर परिणाम झाल्याचे बोलले जात असून कर्मचारी वर्गातही अस्वस्थता वाढल्याचे चित्र आहे. दरम्यान, डॉ. भायेकर यांच्या जागी स्वच्छ प्रतिमा व कार्यक्षम अधिकारी नियुक्त करण्यासाठी हालचाली सुरू असल्याची माहिती विश्वसनीय सूत्रांनी दिली आहे.
जर या प्रकरणात कारवाई झाली, तर जिल्ह्यातील आरोग्य यंत्रणेत मोठा प्रशासकीय बदल होण्याची शक्यता व्यक्त होत असून सर्वसामान्य नागरिकांना दिलासा मिळेल, अशी अपेक्षा व्यक्त केली जात आहे. नागरिकांकडून संपूर्ण प्रकरणाची सखोल चौकशी करून दोषींवर कठोर कारवाई करण्याची मागणीही जोर धरत आहे.
दरम्यान, औषध खरेदी घोटाळ्याचा धुरळा पुढे आणखी कोणते धक्कादायक खुलासे करणार, याकडे जिल्ह्याचे लक्ष लागले आहे.
तसेच जिल्हा आरोग्य अधिकारी डॉ. सचिन भायेकर यांच्या कथित मनमानी कारभाराचे पितळ दैनिक हॅलो बातमीदारच्या माध्यमातून वेळोवेळी उघड होत असल्याची चर्चा देखील रंगली आहे.
आता प्रशासन कोणती ठोस पावले उचलते आणि उचलबांगळीची चर्चा प्रत्यक्षात उतरते का, हे पाहणे महत्त्वाचे ठरणार आहे.
