तालुका प्रतिनिधी : राहुल जयकर
यावल : माहिती अधिकाराचा वापर करून विविध प्रकरणे उघड करणाऱ्या कार्यकर्त्याला दोन अज्ञात इसमांनी जीवे मारण्याची धमकी दिल्याची धक्कादायक घटना यावल येथे घडली आहे. या प्रकारामुळे शहरात एकच खळबळ उडाली आहे.
मिळालेल्या माहितीनुसार, दि. २६ फेब्रुवारी रोजी सायंकाळी सुमारे सहा वाजता विरावली रोडवरील कृषी कार्यालयासमोर सार्वजनिक ठिकाणी हनीफखान हमीद खान (लाला) (वय ४८) यांना दोन इसमांनी अडवून दमदाटी केली. संबंधित कार्यकर्त्याने यावल नगरपालिकेतील कामकाज तसेच डॉ. झाकीर हुसेन शाळा आणि जमीन खरेदी-विक्री संदर्भात माहिती अधिकाराखाली अर्ज दाखल केले होते.
“तू वारंवार अर्ज करतोस, जास्त पुढे येऊ नकोस; नाहीतर तुझी व तुझ्या कुटुंबाची अवस्था वाईट करू,” अशा शब्दांत धमकी देण्यात आल्याचे तक्रारीत नमूद आहे.
या प्रकरणी यावल पोलीस स्टेशन येथे गुन्हा नोंदविण्यात आला असून पोलिसांनी आरोपींचा शोध सुरू केला आहे.
आरटीआय कार्यकर्त्याच्या सुरक्षेचा प्रश्न ऐरणीवर आला असून आरोपींवर कठोर कारवाई करण्याची मागणी नागरिकांकडून जोर धरू लागली आहे.
