अहिल्यानगर/प्रशांत बाफना
शहरात खुलेआम मावा, गुटखा तसेच विविध नशीले पदार्थांची विक्री होत असल्याचे चित्र सध्या पाहायला मिळत आहे. विशेष म्हणजे अल्पवयीन मुले आणि युवक या पदार्थांच्या आहारी जात असल्याने पालकांमध्ये चिंतेचे वातावरण निर्माण झाले आहे. शहरातील काही टपऱ्या, पानटपऱ्या आणि हॉटेल परिसरात नियमांना धाब्यावर बसवून विक्री सुरू असल्याचा आरोप नागरिकांकडून केला जात आहे.
शाळा व महाविद्यालयांच्या परिसरातही सहजपणे गुटखा, मावा आणि अन्य नशीले पदार्थ उपलब्ध होत असल्याने विद्यार्थ्यांमध्ये व्यसनाचे प्रमाण वाढत असल्याची चर्चा सुरू आहे. कमी वयातच व्यसन लागल्यामुळे विद्यार्थ्यांच्या आरोग्यावर, शिक्षणावर आणि भविष्यात गंभीर परिणाम होत असल्याचे सामाजिक कार्यकर्त्यांचे मत आहे.
नागरिकांनी प्रशासनाकडे वारंवार तक्रारी करूनही ठोस कारवाई होत नसल्याची नाराजी व्यक्त केली जात आहे. संबंधित विभागाने शहरात विशेष मोहीम राबवून अवैध विक्री करणाऱ्यांवर कठोर कारवाई करावी, अशी मागणी आता जोर धरू लागली आहे. डॉक्टरांच्या मते, मावा, गुटखा आणि नशीले पदार्थांचे सेवन केल्याने तोंडाचे आजार, कर्करोग, मानसिक अस्थिरता तसेच इतर गंभीर आरोग्य समस्या निर्माण होऊ शकतात.
त्यामुळे पालकांनीही आपल्या मुलांवर लक्ष ठेवून त्यांना व्यसनांपासून दूर ठेवण्यासाठी जागरूक राहणे आवश्यक असल्याचे आवाहन करण्यात येत आहे. शहरातील वाढत्या व्यसनाधीनतेमुळे सामाजिक वातावरण बिघडत असून, यावर वेळीच नियंत्रण आणणे गरजेचे असल्याची भावना नागरिकांमधून व्यक्त होत आहे
