उपसंपादक : मिलिंद जंजाळे
पर्यावरण संवर्धनाचा संदेश समाजाच्या प्रत्येक घटकापर्यंत पोहोचविण्यासाठी यावल तहसील कार्यालयाच्या परिसरात वृक्षारोपणाचा उत्साहपूर्ण कार्यक्रम आयोजित करण्यात आला. यावेळी तहसीलदार मोहनमाला नाझीरकर यांच्या हस्ते विविध प्रकारच्या वृक्षांची लागवड करण्यात आली. “एक झाड प्रत्येकाने लावा, पर्यावरण वाचवा” हा संदेश देत उपस्थितांना वृक्षसंवर्धनाची सामूहिक शपथ देण्यात आली.
कार्यक्रमात तहसीलदार मोहनमाला नाझीरकर यांनी सांगितले की, वाढते तापमान, अनियमित पाऊस, प्रदूषण आणि पर्यावरणाचा होत असलेला ऱ्हास लक्षात घेता वृक्षारोपण ही केवळ औपचारिकता नसून काळाची गरज आहे. प्रत्येक नागरिकाने दरवर्षी किमान एक झाड लावून त्याचे संगोपन केले, तर पर्यावरणाचा समतोल राखण्यास मोठी मदत होईल.
यावेळी महसूल विभागातील अधिकारी, कर्मचारी तसेच उपस्थित नागरिकांनीही वृक्षारोपणात सक्रिय सहभाग घेतला. कार्यालय परिसर अधिक हिरवागार आणि पर्यावरणपूरक करण्याचा संकल्प करण्यात आला.
वृक्षारोपणानंतर उपस्थितांना झाडे लावण्याबरोबरच त्यांचे नियमित संगोपन, पाणी देणे, संरक्षण करणे आणि ती जगविण्याचे महत्त्वही पटवून देण्यात आले. “झाडे लावा, झाडे जगवा” हा संदेश प्रत्येक नागरिकापर्यंत पोहोचविण्याचे आवाहन यावेळी करण्यात आले.
पर्यावरण संरक्षणासाठी शासनाच्या विविध अभियानांना यावल तहसील कार्यालयाने कृतीतून बळ दिल्याची भावना उपस्थितांनी व्यक्त केली. या उपक्रमामुळे परिसरात हरित वातावरण निर्माण होण्यास हातभार लागणार असून नागरिकांनीही मोठ्या प्रमाणावर अशा मोहिमेत सहभागी व्हावे, असे आवाहन करण्यात आले.
वृक्षारोपण हा केवळ एक दिवसाचा कार्यक्रम नसून भविष्यातील पिढ्यांसाठी हिरवीगार, स्वच्छ आणि निरोगी पृथ्वी निर्माण करण्याचा संकल्प असल्याचे मत अनेकांनी व्यक्त केले. यावल तहसील कार्यालयाचा हा उपक्रम पर्यावरण संरक्षणासाठी प्रेरणादायी ठरत असून “एक झाड प्रत्येकाने लावा” हा संदेश जनमानसात रुजविण्याचा प्रभावी प्रयत्न म्हणून त्याकडे पाहिले जात आहे.
यावेळी यावल तहसीलदार मोहनमाला नाझीरकर नायब तहसीलदार गांगुर्डे, वरिष्ठ लिपिक सुयोग पाटील, यांच्या सह यावल तहसील कार्यालयातील अधिकारी कर्मचारी वर्ग उपस्थित होते.
