जळगाव : राष्ट्रपिता महात्मा गांधी आणि माजी पंतप्रधान लालबहादूर शास्त्री यांच्या जयंतीनिमित्त राष्ट्रवादी काँग्रेस पार्टी (शरदचंद्र पवार)च्या जळगाव महानगर जिल्हा कार्यालयात गुरुवारी, २ ऑक्टोबर रोजी अभिवादन कार्यक्रम आयोजित करण्यात आला.
यावेळी महानगर जिल्हाध्यक्ष अशोक लाडवंजारी आणि जिल्हा कार्यालय सरचिटणीस वाय. एस. महाजन यांच्या हस्ते महात्मा गांधी व लालबहादूर शास्त्री यांच्या प्रतिमांना पुष्पहार अर्पण करून विनम्र अभिवादन करण्यात आले.
कार्यक्रमात वाय. एस. महाजन यांनी महात्मा गांधी यांच्या सत्य, अहिंसा आणि शांततेच्या विचारांसह लालबहादूर शास्त्री यांच्या साधेपणा, देशसेवा आणि कर्तव्यनिष्ठेबद्दल मनोगत व्यक्त केले. दोन्ही महान नेत्यांचे विचार आणि कार्य आजच्या पिढीसाठी प्रेरणादायी असल्याचे त्यांनी सांगितले.
यावेळी प्रदेश सरचिटणीस एजाजभाई मलिक, प्रदेश सरचिटणीस जयप्रकाश चांगरे, जिल्हा कार्यालय सरचिटणीस सुनील माळी, समन्वयक विकासदादा पवार, जळगाव शहर विधानसभा प्रमुख जयप्रकाश महाडिक, ओबीसी सेल जिल्हाध्यक्ष गिरीश सांगळे, अल्पसंख्याक जिल्हाध्यक्ष मजहरभाई पठाण, जिल्हा उपाध्यक्ष किरणभाऊ राजपूत, माजी ओबीसी सेल जिल्हाध्यक्ष नामदेव वाघ, सरचिटणीस सुहासभाऊ चौधरी, फहरान शेख, सतीश चौव्हाण यांच्यासह पक्षाचे पदाधिकारी व कार्यकर्ते उपस्थित होते.
