उपसंपादक : मिलिंद जंजाळे
किनगाव :
किनगाव येथील प्राथमिक आरोग्य केंद्रात अत्यंत धक्कादायक आणि संतापजनक प्रकार समोर आला असून, रुग्णांना मूलभूत सुविधा देखील मिळत नसल्याचे चित्र उघड झाले आहे. जागेच्या तीव्र अभावामुळे चक्क दोन गरोदर मातांना एकाच बेडवर सलाईन लावून उपचार करण्यात आल्याची धक्कादायक घटना घडली आहे.
आरोग्य केंद्रात तपासणीसाठी आणि सलाईन लावण्यासाठी पुरेशी जागा नसल्याने रुग्णांना अक्षरशः जीव मुठीत धरून उपचार घ्यावे लागत आहेत. ग्रामीण रुग्णालय बंद असल्यामुळे संपूर्ण भार या छोट्याशा प्राथमिक आरोग्य केंद्रावर पडला आहे. परिणामी, एकाच लहान खोलीत डॉक्टर व कर्मचारी जीव धोक्यात घालून सेवा देत आहेत.
विशेष म्हणजे, येथील वैद्यकीय अधिकारी व कर्मचारी नागरिकांची गैरसोय होऊ नये म्हणून मर्यादित साधनसामग्रीत उत्तम सेवा देण्याचा प्रयत्न करत आहेत. मात्र, प्रशासनाच्या निष्क्रियतेमुळे त्यांचे हे प्रयत्न अपुरे पडत असल्याचे स्पष्ट दिसून येत आहे.
दरम्यान, किनगाव येथील ग्रामीण रुग्णालय गेल्या अनेक दिवसांपासून बंद अवस्थेत असल्याने नागरिकांमध्ये तीव्र संताप व्यक्त होत आहे. ग्रामीण रुग्णालय सुरू झाले असते तर अशा अमानवी घटना घडल्या नसत्या, अशी संतप्त प्रतिक्रिया स्थानिक नागरिकांकडून व्यक्त होत आहे.
प्रश्न उपस्थित होतो —
गरोदर महिलांच्या जीवाशी असा खेळ का?
आरोग्य व्यवस्थेची ही दुर्दशा नेमकी कोणामुळे?
ग्रामीण रुग्णालय सुरू करण्यात प्रशासन अपयशी का?
किनगावातील ही परिस्थिती म्हणजे आरोग्य व्यवस्थेवरचा मोठा कलंक ठरत असून, तात्काळ उपाययोजना न झाल्यास मोठा अनर्थ घडण्याची भीती व्यक्त केली जात आहे.
नागरिकांची मागणी :
किनगाव ग्रामीण रुग्णालय तात्काळ सुरू करावे
प्राथमिक आरोग्य केंद्राला आवश्यक सुविधा व जागा उपलब्ध करून द्यावी.
आता तरी प्रशासन जागे होणार का? की एखादा गंभीर प्रसंग घडल्यावरच हालचाल होणार?
