मेहरून (जळगाव) प्रतिनिधी – गुरू-ब्रह्मा, गुरू-विष्णूच्या पावन परंपरेचा जागर करत श्रीराम माध्यमिक विद्यालयात दि. ५ सप्टेंबर २०२६ रोजी शिक्षक दिन मोठ्या उत्साहात व कृतज्ञतापूर्वक साजरा करण्यात आला. भारताचे माजी राष्ट्रपती, थोर तत्वज्ञ डॉ. सर्वपल्ली राधाकृष्णन यांच्या जयंतीचे औचित्य साधून हा कार्यक्रम संपन्न झाला.
विद्यार्थी झाले एक दिवसाचे शिक्षक, मुख्याध्यापक आणि कर्मचारी
या दिनाचे वैशिष्ट्य म्हणजे इयत्ता ५ वी ते १० वी च्या निवडक विद्यार्थ्यांनी स्वतः शिक्षकाच्या भूमिकेत जाऊन विविध विषयांचे अध्यापन केले. अध्यापनाचा खरा अनुभव घेताना विद्यार्थ्यांच्या डोळ्यात आत्मविश्वास झळकत होता.
कु. आलिया राजू शेख हिने एक दिवसाच्या मुख्याध्यापकाची जबाबदारी सांभाळत संपूर्ण शालेय कामकाजाची धुरा सांभाळली, तर पुष्कर चौधरी याने उपमुख्याध्यापक म्हणून तिला समर्थ साथ दिली. इतर विद्यार्थ्यांनी शिपाई, लिपिक अशा कर्मचाऱ्यांच्या भूमिकेतून शालेय प्रशासनाचा अनुभव घेतला.
मान्यवरांची उपस्थिती आणि विद्यार्थ्यांचे मनोगत
कार्यक्रमाच्या अध्यक्षस्थानी श्रीराम प्राथमिक व माध्यमिक विद्यालयाचे उपाध्यक्ष श्री. बाळाजी सानप सर होते. तर प्रमुख अतिथी म्हणून संस्थेचे अध्यक्ष श्री. पन्नालाल वंजारी, राष्ट्रवादी काँग्रेस शरदचंद्र पवार पक्षाचे जिल्हाअध्यक्ष , संस्थेचे सचिव श्री. अशोकभाऊ लाडवंजारी, मुख्याध्यापक श्री. दिवाकर जोशी सर, संचालक श्री. भगवान लाडवंजारी व शिक्षक श्री. अमित तडवी सर उपस्थित होते. मान्यवरांचे विद्यालयातर्फे पुष्पगुच्छ देऊन स्वागत करण्यात आले.
यावेळी शिक्षक बनलेल्या खुशी माळी, पुष्कर चौधरी या विद्यार्थ्यांनी आपले अध्यापनाचे अनुभव कथन केले. तर वैष्णवी सिद्धार्थ, आलिया पिंजारी या विद्यार्थिनींनी शिक्षक दिनाचे महत्त्व विशद केले.
विद्यालयाचे मुख्याध्यापक श्री. दिवाकर जोशी सर यांनी विद्यार्थ्यांना शालेय कामकाजाची माहिती देत मार्गदर्शन केले. प्रमुख अतिथी व शिक्षक श्री. अमित तडवी सर यांनी शिक्षक दिन का साजरा केला जातो? आणि डॉ. सर्वपल्ली राधाकृष्णन यांच्या महान कार्याचा आढावा घेतला.
अध्यक्षीय भाषणात श्री. बाळाजी सानप सर यांनी विद्यार्थ्यांना शिस्त, संस्कार आणि अभ्यासाचे महत्त्व पटवून दिले. यावेळी संस्थेतर्फे श्रीराम प्राथमिक व माध्यमिक विद्यालयातील सर्व शिक्षक व कर्मचाऱ्यांचा यथोचित सत्कार करण्यात आला.
या कार्यक्रमाचे उत्कृष्ट नियोजन सांस्कृतिक प्रमुख श्री. किरण पाटील सर, उपसांस्कृतिक प्रमुख श्री. दिनेश पाटील सर व सौ. प्रतिभा पाटील मॅडम यांनी केले. कार्यक्रमाचे सूत्रसंचालन कल्याणी कोचुरे हिने केले. कार्यक्रमाच्या यशस्वीतेसाठी सर्व शिक्षक व कर्मचाऱ्यांनी विशेष परिश्रम घेतले.
