अहिल्यानगर । प्रशांत बाफना
शनैश्चर अमावस्येनिमित्त शनिवार, दि. 10 ऑक्टोबर रोजी शनिशिंगणापूर येथे लाखो भाविक दाखल होण्याची शक्यता असल्याने पोलीस, महसूल प्रशासन आणि देवस्थान ट्रस्टकडून व्यापक तयारी करण्यात आली आहे. गर्दीचे नियोजन, वाहतूक नियंत्रण, सुरक्षित दर्शन आणि कायदा-सुव्यवस्था अबाधित ठेवण्यासाठी विविध उपाययोजना लागू करण्यात आल्या आहेत.
या पार्श्वभूमीवर पोलीस अधीक्षक व उपविभागीय अधिकारी यांच्या प्रमुख उपस्थितीत विविध विभागांची संयुक्त आढावा बैठक झाली. त्यानंतर मंदिर परिसर, दर्शन रांगा तसेच वाहनतळांची प्रत्यक्ष पाहणी करण्यात आली. भाविकांची संभाव्य गर्दी लक्षात घेऊन वाहतूक कोंडी टाळण्यासाठी मार्गनिहाय स्वतंत्र वाहनतळांची व्यवस्था करण्यात आली आहे.शिर्डी व कोपरगावमार्गे येणारी वाहने श्री शनेश्वर देवस्थानचे क्षेत्र गट क्र. 809 (सोनई) तसेच मुळा कारखाना परिसरातील वाहनतळावर उभी करावी लागणार आहेत. तर छत्रपती संभाजीनगर व अहिल्यानगरमार्गे येणाऱ्या वाहनांसाठी जोगेश्वरी मिसळ मार्गे श्री शनेश्वर देवस्थानच्या क्षेत्र गट क्र. 401 येथे वाहनतळाची व्यवस्था करण्यात आली आहे.
निश्चित पार्किंग क्षेत्राच्या पुढे चारचाकी वाहनांना शिंगणापूर गावात प्रवेश करण्यास सक्त मनाई करण्यात आली आहे. दुचाकी व तीनचाकी वाहनांसाठी स्वतंत्र पार्किंग व्यवस्था करण्यात आली आहे. भाविकांच्या वाहतुकीसाठी एसटी महामंडळाकडून जादा बसेस व विशेष वाहतूक सेवा उपलब्ध करून देण्यात येणार आहे.भाविकांच्या सोयीसाठी दर्शन रांगा आणि मंदिर परिसरात ठिकठिकाणी पिण्याच्या पाण्याची व्यवस्था करण्यात आली आहे. आपत्कालीन परिस्थितीसाठी डॉक्टरांची पथके, रुग्णवाहिका आणि प्रथमोपचार कक्ष 24 तास सज्ज ठेवण्यात येणार आहेत. ऑक्टोबरमधील संभाव्य उष्णता लक्षात घेता भाविकांनी टोपी, छत्री आदींचा वापर करावा तसेच पुरेसे पाणी प्यावे, असे आवाहन प्रशासनाने केले आहे.
चौथरा दर्शन बंद; मुखदर्शनाची व्यवस्था
अमावस्येच्या कालावधीत होणारी गर्दी लक्षात घेता चौथऱ्यावर जाऊन दर्शन घेण्याची सुविधा बंद ठेवण्यात येणार आहे. भाविकांना मुखदर्शन घेता येणार आहे. तेल अर्पणासाठीही विशेष व्यवस्था करण्यात आली आहे. भाविकांनी देवस्थानच्या मुख्य महाद्वारातून दर्शन रांगेत प्रवेश करावा. महाद्वारात मोठ्या क्षमतेचे तेल साठवणूक टँक बसविण्यात आले असून भाविकांनी आणलेल्या तेलाच्या बाटल्या थेट या टँकमध्ये अर्पण कराव्यात.मोठे तेलाचे डबे अथवा बॉक्स दर्शन रांगेत नेता येणार नाहीत. त्यासाठी देवस्थानकडून स्वतंत्र जमा व्यवस्था करण्यात आली आहे
