रावेर | प्रतिनिधी – उमेश तायडे
अनुसूचित जाती आरक्षण उपवर्गीकरण विरोधी मोर्चा कृती समिती, रावेर तालुक्याच्या वतीने सामाजिक न्याय, संविधानिक हक्क आणि भावी पिढीच्या भवितव्याच्या संरक्षणासाठी व्यापक जनजागृती अभियान सुरू करण्यात आले आहे. या अभियानांतर्गत समितीचे पदाधिकारी व सामाजिक कार्यकर्ते गावोगावी भेटी देत नागरिकांशी संवाद साधत असून, समाजबांधवांना संघटित होऊन आगामी मोर्चात सहभागी होण्याचे आवाहन करत आहेत.
समितीच्या वतीने करण्यात आलेल्या आवाहनात, ही केवळ एका व्यक्तीची किंवा एका संघटनेची लढाई नसून समाजाच्या स्वाभिमानाची, संविधानिक हक्कांच्या संरक्षणाची आणि भावी पिढीच्या सुरक्षित भविष्याची लढाई असल्याचे नमूद करण्यात आले आहे. त्यामुळे समाजातील प्रत्येक घटकाने या आंदोलनात सक्रिय सहभाग नोंदविण्याची गरज व्यक्त करण्यात आली आहे.
यासाठी सोमवार, दि. १० ऑगस्ट २०२६ रोजी आयोजित अनुसूचित जाती आरक्षण उपवर्गीकरण विरोधी मोर्चात कुटुंबीय, मित्रपरिवार आणि गावातील जास्तीत जास्त समाजबांधवांसह मोठ्या संख्येने सहभागी होण्याचे आवाहन कृती समितीने केले आहे.
“आज आपण एकजूट दाखवली तर उद्याचे भविष्य सुरक्षित राहील. आपली एकजूट हीच आपली सर्वात मोठी ताकद आहे,” असे समितीच्या वतीने प्रसिद्ध करण्यात आलेल्या आवाहनात म्हटले असून, डॉ. बाबासाहेब आंबेडकर यांचा “शिका, संघटित व्हा, संघर्ष करा” हा संदेशही यावेळी अधोरेखित करण्यात आला आहे.
या जनजागृती अभियानाला रावेर तालुक्यातील विविध गावांमधून सकारात्मक प्रतिसाद मिळत असून, मोर्चात मोठ्या संख्येने समाजबांधव सहभागी होतील, असा विश्वास आयोजकांनी व्यक्त केला आहे.
