जळगाव : विविध क्षेत्रांत उल्लेखनीय कार्य करणाऱ्या मान्यवरांच्या कार्याची दखल घेत दैनिक नवराष्ट्रच्या वतीने जळगाव येथे सन्मान सोहळ्याचे आयोजन करण्यात आले. या सोहळ्यात निंभोरा सिम येथील माजी सरपंच तथा सामाजिक समता मंचचे अध्यक्ष राजू भाऊ सवर्णे यांना त्यांच्या उल्लेखनीय सामाजिक कार्याची दखल घेत ‘समाजसेवी’ पुरस्काराने गौरविण्यात आले.
राजू सवर्णे यांनी सामाजिक जीवनात विविध उपेक्षित व गरजू घटकांसाठी सातत्याने कार्य केले आहे. दलित वस्ती पुनर्वसनाचा प्रश्न, तसेच विधवा, परितक्त्या, वयोवृद्ध, दिव्यांग आणि आर्थिकदृष्ट्या गरजू नागरिकांच्या विविध समस्या सोडविण्यासाठी त्यांनी वेळोवेळी पुढाकार घेतला आहे. त्यांच्या या सामाजिक योगदानाची दखल घेत त्यांना हा पुरस्कार प्रदान करण्यात आला.
जळगाव जिल्ह्याचे पालकमंत्री तथा महाराष्ट्र राज्याचे पाणीपुरवठा मंत्री ना. गुलाबराव पाटील यांच्या हस्ते राजू सवर्णे यांचा गौरव करण्यात आला. यावेळी जळगावचे जिल्हाधिकारी रोहन घुगे, माजी मंत्री तथा अमळनेर विधानसभा मतदारसंघाचे आमदार अनिल भाईदास पाटील, जळगाव जिल्हा पोलीस अधीक्षक श्रीकांत धिवरे, जळगाव लोकसभा मतदारसंघाच्या खासदार स्मिता वाघ, आमदार सुरेश मामा भोळे यांच्यासह दैनिक नवराष्ट्र समूहाचे पत्रकार आणि जिल्ह्यातील विविध क्षेत्रांतील मान्यवर उपस्थित होते.
या सन्मानामुळे निंभोरा सिम परिसरासह सामाजिक क्षेत्रातून राजू सवर्णे यांच्यावर अभिनंदनाचा वर्षाव होत असून, त्यांच्या पुढील सामाजिक वाटचालीसाठी शुभेच्छा व्यक्त करण्यात येत आहेत.
रावेर तालुका प्रतिनिधी – उमेश तायडे
