उपसंपादक :-मिलिंद जंजाळे
यावल (दि. 06 फेब्रुवारी 2026) — क्षयरोगाविरुद्धच्या लढ्यात रुग्णांना उपचारासोबत योग्य पोषण मिळावे यासाठी यावल तालुका आरोग्य अधिकारी कार्यालयात आज महत्त्वपूर्ण उपक्रम राबविण्यात आला. आयुध निर्माणी वरणगाव व जिल्हा क्षयरोग केंद्र जळगाव यांच्या संयुक्त विद्यमाने गरजू क्षयरुग्णांना पोषण आहार किटचे वाटप करण्यात आले.
हा उपक्रम जिल्हा क्षयरोग अधिकारी डॉ. विशाल पाटील, जिल्हा आरोग्य अधिकारी डॉ. सचिन भायेकर आणि तालुका आरोग्य अधिकारी डॉ. राजू तडवी यांच्या मार्गदर्शनाखाली पार पडला. प्राथमिक आरोग्य केंद्र साकळी येथे वैद्यकीय अधिकारी डॉ. मुकेश चौधरी यांच्या हस्ते लाभार्थी रुग्णांना किट वितरित करण्यात आले.
यावेळी आरोग्य सेविका रमा पवार, आरोग्य सेवक सल्लाऊद्दीन शेख, आरोग्य सेविका मनिषा कोळी, वरिष्ठ क्षयरोग अधिकारी मिलिंद राणे, सामाजिक कार्यकर्ते तसेच सर्व लाभार्थी क्षयरुग्ण उपस्थित होते.
कार्यक्रमात डॉ. मुकेश चौधरी यांनी क्षयरुग्णांना नियमित उपचार, औषधोपचार पूर्ण करण्याचे महत्त्व आणि पोषणयुक्त आहाराची गरज याबाबत सविस्तर मार्गदर्शन केले. “क्षयरोगावर मात करण्यासाठी औषधांसोबतच सकस आहार अत्यंत आवश्यक आहे,” असे त्यांनी स्पष्ट केले.
या उपक्रमामुळे रुग्णांना मोठा दिलासा मिळाला असून आरोग्य विभागाच्या या संवेदनशील पुढाकाराचे सर्व स्तरांतून कौतुक होत आहे.
