जळगाव प्रतिनिधी संजय निकम: जळगाव शहरातील पिंप्राळा हुडको परिसरात यंदाच्या गणेशोत्सवासाठी उत्साहाचे वातावरण निर्माण झाले असून, मंडळाच्या वतीने तब्बल १२ फूट उंच गणेशमूर्तीची प्रतिष्ठापना करण्यात आली आहे. भव्य आणि आकर्षक स्वरूपातील बाप्पांची मूर्ती परिसरातील भाविकांचे विशेष लक्ष वेधून घेत आहे.
गणेशमूर्तीच्या आगमनासाठी मंडळाच्या कार्यकर्त्यांनी जय्यत तयारी केली असून, ढोल-ताशांच्या गजरात आणि गणपती बाप्पा मोरयाच्या जयघोषात बाप्पांचे स्वागत करण्यात आले. परिसरातील नागरिक आणि गणेशभक्तांनी मोठ्या संख्येने उपस्थित राहून बाप्पांचे दर्शन घेतले.
या गणेशोत्सवाचे नियोजन मंडळ अध्यक्ष विकी माय यांच्या मार्गदर्शनाखाली कार्यकर्त्यांकडून करण्यात येत आहे. गणेशोत्सवाच्या काळात विविध धार्मिक, सामाजिक आणि सांस्कृतिक उपक्रमांचे आयोजन करण्यासाठी कार्यकर्त्यांची लगबग सुरू आहे.
१२ फूट उंच भव्य गणेशमूर्ती, आकर्षक सजावट आणि कार्यकर्त्यांचा उत्साह यामुळे यंदाचा गणेशोत्सव पिंप्राळा हुडको परिसरातील विशेष आकर्षण ठरत आहे.
