तालुका प्रतिनिधी : राहुल जयकर
सांगवी बुद्रुक, ता. यावल : ज्योती विद्या मंदिर तथा ज्ञानपीठ प्राप्त पद्मश्री भालचंद्र नेमाडे कनिष्ठ महाविद्यालय, सांगवी बुद्रुक येथील इयत्ता ११ वी विज्ञान शाखेचा विद्यार्थी मिलिंद प्रशांत बोरसे याने जिल्हास्तरीय ओपन साईड रायफल शूटिंग स्पर्धेत प्रथम क्रमांक पटकावून उल्लेखनीय यश संपादन केले.
मिलिंदने स्पर्धेत अचूक नेमबाजीचे कौशल्य आणि आत्मविश्वासाचे दर्शन घडवत प्रथम क्रमांक मिळविला. त्याच्या या यशामुळे विद्यालयाच्या शैक्षणिक तसेच क्रीडा क्षेत्रातील यशात आणखी एक मानाचा तुरा खोवला गेला आहे.
मिलिंदच्या या उल्लेखनीय कामगिरीबद्दल विद्यालयाचे संस्थाचालक, मुख्याध्यापक, शिक्षक व शिक्षकेतर कर्मचारी, विद्यार्थी तसेच पालकांनी त्याचे अभिनंदन केले. तसेच त्याच्या पुढील क्रीडा वाटचालीसाठी हार्दिक शुभेच्छा दिल्या.
मिलिंदच्या या यशाचे सांगवी बुद्रुक परिसरासह सर्वत्र कौतुक होत असून, त्याने आपल्या उल्लेखनीय कामगिरीने विद्यालयाचे नाव जिल्हास्तरावर उज्ज्वल केले आहे.
